An harbi mutum guda a rikicin yan kasuwa da  jami’an Civil Defence a Jos

Mutum ɗaya ya ji rauni an kuma  lalata ababen hawa da dama biyo bayan rikici tsakanin jami’an Hukumar Tsaro da Kare Dukiyar Gwamnati da Fararen Hula ta Najeriya (NSCDC) da ‘yan kasuwa a kasuwar Chorbe da ke karamar hukumar Jos ta Arewa a jihar Filato.

An garzaya da ɗan kasuwar da ya ji rauni zuwa asibiti dake kusa don samun magani. 

Jaridar Daily Trust ta gano cewa jami’an NSCDC sun ce an gayyace su ne daga jami’an kasuwar domin tilastawa yan kasuwar gudanar da tsaftar mako-mako, sai dai wasu daga cikin ‘yan kasuwa da suka ce ba su cikin shirin tsaftar sun ƙi amincewa da tilastawar. 

‘Yan kasuwar da suka fusata sun bayyana cewa shagunan su suna gefen hanya ba cikin kasuwa ba, lamarin da ya jawo muhawara mai zafi har ya kai ga harbin ɗan kasuwa. 

Mai magana da yawun NSCDC na Jihar Filato, ASP NR Rimvyok, ya ce ana binciken lamarin a halin yanzu. 

A cikin daƙiƙa kaɗan, dukkan titunan kusa da kasuwar sun zama fanko yayin da mazauna yankin suka gudu cikin gidajensu. 

An samu tashin hankali a wasu unguwanni ciki har da Apata, Ali Kazaure da Katako bayan ‘yan kasuwar sun sake taruwa domin fuskantar jami’an tsaron.