Mutane 9 aka samu nasarar cetowa daga wani ginin bene mai hawa ɗaya da ya ruguzo a yankin Sabon Gwari dake garin Minna babban birnin jihar Niger.
Da yake tabbatar da faruwar lamarin, Wasiu Abiodun mai magana da yawun rundunar ƴan sandan jihar Niger ya ce ana amfani da ginin ne a matsayin rumbun ajiye kayayyaki.
Ya ce ginin ya ruguzo ne da misalin ƙarfe 2:30 na ranar Juma’a.
Rahotanni sun bayyana cewa wasu mutane da ba a san yawansu ba ne ake tunanin baraguzan ginin ya binne su.
Abiodun ya ce biyu daga cikin mutanen da aka ceto sun samu karamin rauni.
An kai waɗanda aka ceto ya zuwa Babban Asibitin Minna domin samun kulawar likita.
