Sakataren tsaron Amurka, Pete Hegseth, ya bayyana cewa yaƙin da ƙasar ke yi da Iran ya laƙume dala biliyan 37.5 zuwa yanzu. Ya ce wannan ya nuna ƙarin kusan dala biliyan 8 idan aka kwatanta da alƙaluman da aka fitar a watan Mayu.
Hegseth ya faɗa wa kwamitin kasafin kuɗi na majalisar dattawan Amurka cewa ana buƙatar a amince da ƙarin dala biliyan 87 ga ma’aikatar tsaro, inda za a ware dala biliyan 67 domin ayyukan soji a Gabas ta Tsakiya.
Zaman majalisar ya fuskanci katsewa sau da dama bayan masu adawa da yaƙe-yaƙe sun yi zanga-zanga, lamarin da ya haifar da musayar kalamai tsakanin Hegseth da wasu sanatoci.
Wannan shi ne karo na farko da Hegseth ya bayyana a gaban majalisa tun bayan sake ɓarkewar rikicin tsakanin Amurka da Iran a makon da ya gabata. Rahotanni sun ce sojojin Amurka 3 sun rasa rayukansu tun bayan fara sabon rikicin.
Amurka Ta Ce Yaƙi Da Iran Ya Cinye Mata Dala Biliyan 37.5 Zuwa Yanzu
