Wata kotu a Ghana ta yanke wa Ebenezer Frimpong, mai shekara 26, hukuncin ɗaurin wata 1 a gidan yari bayan ya amsa laifin yunƙurin satar motar sulke ta ‘yan sanda.
Rahotanni sun ce lamarin ya faru ne a watan Afrilu, lokacin da direban motar, Joshua Denkyi, ya tsaya a wani kemis domin sayen magani. A wannan lokaci ne matashin ya shiga motar, ya kuma fara tafiya da ita.
Sai dai ‘yan sanda sun bi shi, suka kama shi kafin ya samu nasarar tserewa da motar.
Kafin yanke hukunci, alƙalin kotun ya umarci a yi wa matashin gwajin ƙwaƙwalwa domin tabbatar da halin hankalinsa.
Alƙalin ya ce ya yanke masa hukuncin wata 1 ne saboda ya amsa laifinsa ba tare da ɓata lokacin kotu ba.
Kotu A Ghana Ta Daure Matashi Wata 1 Kan Yunƙurin Satar Motar ‘Yan Sanda
