An harbe wani makiyayi har lahira a jihar Filato

 
Wasu mahara masu ɗauke da makamai sun  kashe wani mutum mai shekara 45 mai suna Alhaji Wada Haruna Abdullahi da  yayin da ya halarci  sallar Juma’a a yankin Maraban Kantoma da ke ƙaramar hukumar Barkin Ladi a Jihar Filato ‘.Rahotanni sun nuna cewa lamarin ya faru ne da misalin ƙarfe 1:00 na rana.

Shugaban ƙungiyar fulani makiya ta MACBAN a Jihar Filato, Ibrahim Yusuf Babayo ne ya tabbatar da faruwar lamarin tare da yin Allah-wadai da kisan. Ya bayyana cewa tashin hankali yana ƙaruwa a wasu ƙananan hukumomin jihar da suka haɗa da Mangu, Barkin Ladi, Riyom, Bassa da Jos North.


A cewar MACBAN, mamacin ya fito ne daga ƙauyen Ropp Mool  da ke gundumar Dorowa Ropp a Barkin Ladi. Ƙungiyar ta yi zargin cewa wasu ‘yan bindiga da ta kira mayaƙan Berom ne suka kai harin, tare da bayyana kisan a matsayin abin takaici da ke barazana ga zaman lafiya da haɗin kai a jihar.


Shugaban MACBAN ya buƙaci hukumomin tsaro su gudanar da cikakken bincike domin gano waɗanda suka aikata laifin da kuma gurfanar da su gaban shari’a. Ya kuma roƙi al’ummar da abin ya shafa su kasance masu haƙuri, su guji ɗaukar doka a hannunsu, kuma su ci gaba da ba jami’an tsaro haɗin kai.


Ƙungiyar MACBAN ta sake jaddada ƙudurinta na inganta zaman lafiya, tattaunawa da hanyoyin warware rikice-rikice cikin doka a jihar Filato. Ta yi kira ga shugabannin al’umma, gwamnati da sauran masu ruwa da tsaki su ƙara ƙoƙari wajen kare rayuka da hana sake aukuwar tashe-tashen hankula. A lokacin da aka nemi jin ta bakin jami’in rundunar Operation Enduring Peace, Kyaftin Polycarp Oteh, bai amsa tambayoyin manema labarai ba.

Loading

Signing-in 3 seconds...

Signing-up 3 seconds...