
Shugaban kwamitin kasafin kudi na Majalisar Wakilai, Abubakar Bichi, ya bukaci al’ummar Arewacin Najeriya su goyi bayan Shugaba Bola Tinubu domin ya sake lashe zaben shugaban kasa a 2027, yana mai cewa bayan kammala wa’adinsa na biyu, mulki zai koma Arewa.
Bichi, wanda ke wakiltar mazabar Bichi ta Jihar Kano a Majalisar Wakilai, ya bayyana hakan ne a wata tattaunawa da kamfanin dillancin labarai na Najeriya (NAN) a ranar Lahadi.
Ya ce ya kamata a bar yankin Kudu ya kammala wa’adin mulki na shekaru takwas kafin a sake mayar da shugabancin kasar Arewa.
A cewarsa, Arewa ta shafe shekaru takwas a kan karagar mulki karkashin marigayi tsohon shugaban kasa Muhammadu Buhari, yayin da Tinubu ya shafe shekaru hudu kacal daga wa’adin da kundin tsarin mulki ya tanada.
Bichi ya ce, “Mun yi wa’adinmu na shekara takwas a karkashin marigayi tsohon shugaban kasa Muhammadu Buhari. Yanzu sun yi shekara hudu, a bar su su kammala kafin mu sake karba.
“A bar Shugaba Tinubu ya kammala wa’adinsa na biyu, sannan mulki ya koma Arewa. Tinubu na son Arewa kuma ya yi wa yankin abubuwa masu kyau.”
Dan majalisar ya kuma yi watsi da zarge-zargen cewa gwamnatin Tinubu ta yi watsi da Arewacin Najeriya, inda ya ce yankin ya amfana sosai daga manufofin gwamnati, ayyukan more rayuwa da sauran shirye-shiryen tallafi da aka aiwatar.