Rundunar ’Yan Sandan Kebbi Ta Biya Iyalan Jami’an Da Suka Mutu Naira Miliyan 21.1

Rundunar ’Yan Sandan Jihar Kebbi ta fitar da kudin tallafi har N21,112,938.02 ga iyalan jami’an da suka rasa rayukansu yayin gudanar da ayyukansu na tsaro.

Sanarwar da rundunar ta fitar ta bayyana cewa an amince da biyan kudin ne bisa umarnin Sufeto-Janar na ’Yan Sanda, domin rage wa iyalan jami’an nauyin matsin tattalin arziki sakamakon rasuwar ’yan uwansu.

A cewar sanarwar, kudin ya shafi takardun biyan kudi guda 38 da aka gabatar ga wadanda suka cancanci amfana da tallafin.

An biya kudaden ne karkashin shirye-shiryen inshorar rayuwar jami’an ’yan sanda (Police Group Life Assurance) da kuma shirin jin dadin iyalan jami’ai na Sufeto-Janar (IGP Family Welfare Scheme), wadanda aka tsara domin tallafa wa iyalan jami’an da suka mutu a bakin aiki.

Rundunar ta gode wa Sufeto-Janar na ’Yan Sanda bisa amincewa da kudaden, inda ta bayyana cewa matakin na daga cikin kokarin tallafa wa iyalan jami’an da suka rasu da kuma inganta walwalarsu.