Farashin Gas Ya Kai Naira 1,800 Kan Kilo A Wasu Sassan Abuja

Farashin iskar gas din girki (LPG) ya sake tashi a Najeriya, inda wasu dillalai a Abuja ke sayar da kilo daya kan kudi har N1,800.

Rahoton Daily Post ya nuna cewa masu gidajen ajiyar gas da ’yan kasuwa sun kara farashin kayayyakin a cikin kwanaki biyu da suka gabata.

Kamfanin StockGap ya kara farashin gas din da N25, inda yanzu yake sayar da kilo daya kan N1,440. Haka kuma, kamfanonin NIPCO, Mobil (wanda yanzu ake kira 11 Plc) da Ardova na sayar da shi kan farashin N1,390 zuwa N1,400 kan kowane kilo.

A bangaren dillalan da ke sayar wa jama’a kai tsaye, kamfanonin Raniol, Juda Oil da gidajen sayar da gas na NNPC a Abuja da kewaye sun kara farashin zuwa tsakanin N1,550 da N1,600 kan kilo daya, daga N1,400 zuwa N1,500 a baya.

Rahoton ya kara da cewa kananan dillalan gas na sayar da kilo daya kan N1,700 zuwa N1,800, gwargwadon wurin da suke gudanar da kasuwancinsu a Abuja.

Tun da farko, mai magana da yawun kamfanin NIPCO, Taofeek Lawal, ya shaida wa Daily Post cewa ana iya samun karin farashin gas tsakanin watan Nuwamba da Janairun shekara mai zuwa.

Sabon karin farashin na nufin cewa mutumin da a baya yake kashe N17,500 wajen cika silinda mai daukar kilo 12.5 a kan farashin N1,400 kan kowane kilo, yanzu zai biya N20,000 idan aka yi amfani da sabon farashin N1,600. Hakan ya nuna karin N2,500 kan kudin da yake kashewa a baya.