An yaye jami’an tsaron kula da dazuka a jihar Katsina

Gwamnatin Jihar Katsina tare da haɗin gwiwar Ofishin Mai Ba Shugaban Ƙasa Shawara kan Harkokin Tsaro (NSA), ta yaye jami’an sintirin dazuka 1,008 na shirin shugaban ƙasa domin kula da dazukan jihar da kuma dakile ayyukan ‘yan ta’adda, ‘yan bindiga da sauran masu aikata laifuka a cikin dazukan.

Da yake jawabi a wajen bikin, Mai Ba Shugaban Ƙasa Shawara kan Harkokin Tsaro, Malam Nuhu Ribadu, ya bayyana cewa kafa rundunar masu gadin dazuka wani shiri ne na gwamnatin tarayya da nufin ƙarfafa yaƙin da ake yi da matsalolin tsaro a faɗin ƙasar.

Ribadu, wanda Darakta a ofishin NSA, Mista I. O. Shotaye ya wakilta, ya ce jami’an sun samu horo na tsawon makonni takwas daga hukumomin tsaro daban-daban. Ya ƙara da cewa daga cikin waɗanda aka yaye 1,008, mutum 18 mata ne.

A nasa jawabin, Gwamnan Jihar Katsina, Malam Umaru Dikko Radda, ya gode wa gwamnatin tarayya bisa amincewa da kafa rundunar, yana mai cewa za ta taimaka wajen ƙarfafa ƙoƙarin da jihar ke yi na magance matsalolin tsaro.

Ya ce masu gadin dazukan za su yi aiki tare da rundunar sa-kai da jami’an tsaron al’umma da jihar ta riga ta kafa, yana mai bayyana kwarin gwiwar cewa wannan mataki zai taimaka wajen shawo kan ƙalubalen tsaro da jihar ke fuskanta.

Gwamnan ya kuma yi alƙawarin ci gaba da tallafa wa rundunar da dukkan abubuwan da suke buƙata domin tabbatar da zaman lafiya, tare da nuna jin daɗinsa cewa a halin yanzu babu wata hanya ko kasuwa da aka rufe a jihar sakamakon rashin tsaro.