APC Ta Bukaci Jami’an Tsaro Su Kama ’Yan Ta’adda da Suka Tarwatsa Taron NDC a Legas

Jam’iyyar All Progressives Congress (APC) ta yi Allah-wadai da tashe-tashen hankula da ake samu a yayin shirye-shiryen babban zaɓen shekarar 2027, inda ta buƙaci jami’an tsaro su kamo waɗanda suka haddasa tarzoma a wani taron jam’iyyar Nigeria Democratic Congress (NDC) a Legas.

A cikin wata sanarwa da ta fitar ranar Alhamis, Dele Alake, na Majalisar Yaƙin Neman Zaɓen Shugaban Ƙasa ta APC, ya bayyana takaicinsa kan tarwatsa wani taron tattaunawa da NDC ta shirya.

Daily Trust ta ruwaito cewa wasu ’yan daba sun kutsa cikin wani ɗakin taro da aka shirya gudanar da taron, inda ake sa ran Peter Obi, ɗan takarar shugaban ƙasa na NDC, zai halarta domin ganawa da magoya bayan jam’iyyar.

Alake ya buƙaci jami’an tsaro su ƙara sanya ido tare da kasancewa cikin shiri domin hana sake faruwar irin wannan lamari a nan gaba.

Ya ce, “Mun lura da yadda hare-haren ta’addanci da tashin hankali ke ƙaruwa a tarukan siyasa a wasu sassan ƙasar nan.

“Rahotannin hare-haren da aka kai a jihohin Edo, Cross River da Gombe, da sauran tashe-tashen hankula da ake kai wa magoya bayan jam’iyyu da shugabannin siyasa ba tare da la’akari da jam’iyyarsu ba, abin Allah-wadai ne.

“Jam’iyyarmu ta yi Allah-wadai matuƙa da tarwatsa taron tattaunawa da Nigeria Democratic Congress (NDC) ta shirya gudanarwa a Legas a yau.”

Ya ƙara da cewa yayin da jam’iyyun siyasa ke ci gaba da yaƙin neman zaɓe, ya kamata shugabanni, ’yan siyasa da magoya bayansu su kame kansu tare da guje wa duk wani abu da zai haddasa rikici da tada zaune tsaye a cikin al’umma.

Alake ya kuma yi kira ga hukumomin tsaro da su ƙara himma wajen hana duk wani nau’in tashin hankali da ya shafi siyasa, tare da kamo waɗanda suka shirya ko suka aikata irin waɗannan laifuka domin hukunta su bisa doka.

Ya buƙaci jam’iyyun siyasa da ’yan takara su mayar da hankali kan batutuwan da za su inganta rayuwar ’yan Najeriya a lokacin yaƙin neman zaɓe, maimakon tunzura jama’a ko haddasa tashin hankali a tarukan siyasa.