Yan bindiga sun kashe shugaban kungiyar fulani makiya ta MACBAN a Takum

Ƴan bindiga sun kashe, Alhaji Ibrahim Sa’idu shugaban kungiyar fulani makiyayan  ta (MACBAN) a karamar hukumar Takum da ke Jihar Taraba.

Majiyoyi daga yankin sun shaida wa Daily Trust cewa an harbe Saidu har lahira a gidansa da ke Anguwan Rogo, cikin garin Takum, a yammacin ranar Lahadi.

Wani mazaunin yankin kuma maƙwabcin marigayin, wanda ya nemi a sakaya sunansa, ya ce maharan sun zo ne a kan babura suna sanye da abin rufe fuska, sannan suka harbe Saidu har sau da dama.

“An kashe shi ne jim kaɗan bayan ya dawo gida daga kasuwar shanu da ke cikin garin,”  a a cewar majiyar.

Ya ce bayan sun kashe shugaban MACBAN ɗin, maharan sun tsere zuwa inda ba a sani ba, lamarin da ya jefa unguwar cikin ruɗani da tashin hankali.

Majiyar ta bayyana marigayin a matsayin mutum mai son zaman lafiya wanda ya rayu cikin jituwa da maƙwabtansa.

“Marigayi Ibrahim maƙwabci ne nagari kuma ya zauna da kowa cikin lumana. Dukkanmu muna jimamin rasuwarsa,” in ji shi

An yi wa Saidu jana’iza tare da binne shi a ranar Talata bisa ga koyarwar addinin Musulunci a Takum.

Rundunar ‘Yan Sandan Jihar Taraba ta tabbatar da kisan, tana mai cewa wasu ‘yan bindiga ne suka kai hari a gidan Saidu, wanda aka fi sani da D.O., a Takum.

Mai magana da yawun rundunar, Victor Mshelizah, ya bayyana a cikin wata sanarwa ranar Talata cewa ‘yan sanda sun fara farautar maharan.



“Bayanan farko sun nuna cewa maharan sun zo ne a kan babur kafin su aiwatar da harin.

“An fara bincike domin gano yadda lamarin ya faru, tantance waɗanda suka aikata wannan laifi da kuma tabbatar da an gurfanar da su gaban shari’a.”ya ce .

Mshelizah ya ce Kwamishinan ‘Yan Sandan jihar, Edwin Ogbeghagha, ya umarci a ɗauki dukkan matakan bincike da suka dace domin gano musabbabin kisan.

Haka kuma ya ce rundunar na aiki tare da sauran hukumomin tsaro domin ƙarfafa tsaro a yankin da abin ya shafa tare da hana duk wani yiwuwar rikicewar doka da oda.

Kakakin ‘yan sandan ya yi kira ga al’ummomin yankin, iyalan mamacin, abokan hulɗarsa da magoya bayansa da su kwantar da hankalinsu, tare da kauce wa duk wani mataki da ka iya ƙara tayar da hankali ko haifar da ramuwar gayya.

Ya kuma buƙaci jama’a da su guji yaɗa bayanan da ba a tabbatar da sahihancinsu ba, jita-jita ko zarge-zargen da za su iya kawo cikas ga binciken da ake gudanarwa ko kuma barazana ga zaman lafiya.

“Duk wanda ke da sahihin bayani da zai taimaka wa binciken ana ƙarfafa masa gwiwa ya tuntuɓi ‘yan sanda ko kuma wasu hukumomin tsaro da suka dace,” in ji shi.

Rundunar ta jajanta wa iyalan marigayin, abokan hulɗarsa da kuma mambobin ƙungiyar MACBAN bisa wannan babban rashi.