Wasu maharan sun kashe jami’in hukumar shige da fice ta ƙasa

Hukumar Shige da Fice ta Nijeriya (NIS) ta bayyana cewa an kashe ɗaya daga cikin jami’anta yayin da wani ya samu raunuka sakamakon harin da wasu mahara suka kai wa jami’an da ke aikin sintiri a jihar Neja.

A wata sanarwa da ya fitar ranar Alhamis, jami’in hulɗa da jama’a na hukumar, Akinsola Akinlabi, ya ce lamarin ya faru ne da misalin ƙarfe 11:30 na safe a ranar 6 ga Oktoba.

Akinlabi ya ce jami’an biyu na gudanar da sintirin sa ido na yau da kullum ne a yankin Tunga Taya zuwa Woro a jihar lokacin da wasu mahara da ba a tantance ko su wanene ba suka kai musu hari.

“Abin takaici, ɗaya daga cikin jami’anmu, ASI I.U. Babangida, ya rasa ransa yayin harin, yayin da ɗayan jami’in, Insifekta A.K. Musa, ya samu munanan raunuka amma ya samu nasarar tserewa. A halin yanzu yana karɓar magani,” in ji sanarwar.

“An riga an yi jana’izar jami’in da ya rasu bisa ga koyarwar addinin Musulunci. Hukumar tana girmama sadaukarwarsa da kuma jajircewarsa wajen gudanar da aikinsa.

“Hukumar tana miƙa ta’aziyyarta ga iyalai, abokan aiki da sauran masoyan marigayin, tare da yi wa jami’in da ya ji rauni fatan samun sauƙi cikin gaggawa. Haka kuma tana tabbatar wa iyalan biyu da ci gaba da ba su dukkan goyon baya da taimakon da suke buƙata a wannan lokaci mai wahala.”

Hukumar NIS ta ce tana aiki tare da gwamnatin jihar Neja da sauran hukumomin tsaro domin gano tare da cafke waɗanda suka kai harin.

Har ila yau, hukumar ta jaddada cewa wannan hari ba zai hana ta ci gaba da aiwatar da nauyin da ya rataya a wuyanta na kare iyakokin Nijeriya ba.