NDLEA ta sake kama wata tsohuwa mai shekaru 83 dake sayar da miyagun ƙwayoyi

Hukumar Yaƙi da Sha da Fataucin Miyagun Ƙwayoyi ta Ƙasa (NDLEA) ta sake kama wata tsohuwa mai shekara 83, Uloma Sunday a jihar Abia da miyagun ƙwayoyi irin su ƙwayar methamphetamine, da Colorado kusan II watanni 17 bayan kama ta na farko.

Darakta mai kula da yaɗa labarai da wayar da kai na NDLEA, Femi Babafemi,  ne ya bayyana haka a wata sanarwa ranar Lahadi cewa an kama matar ne a ranar 7 ga Oktoba a gidanta da ke Ite-Uzo, Umuaguma, ƙaramar hukumar Obingwa, inda aka samu miyagun ƙwayoyin ɓoye a jikinta a ƙarƙashin ɗaurin sani.

Babafemi ya ce kama ta da aka yi  ya biyo bayan bayanan sirri da suka nuna cewa Ulama na gudanar da wurin sayar da miyagun ƙwayoyi, inda masu aikata laifuffuka da ke addabar al’umma suke taruwa.

Ya ƙara da cewa an fara kama matar ne tare da ‘yarta Chisom  Uchechi, mai shekara 32, a ranar 17 ga  watan Mayu na shekarar 2025, a wannan gidan nata , inda aka kwace giram 50 na kwayar methamphetamine, giram 522 na ƙwayar skunk, gram 260 na ɗanyen ganyen tabar wiwi  da giram 12 na ƙwayar tramadol.

Sanarwar ta ce duka biyun sun amsa laifinsu a kotu, inda aka yanke musu hukuncin ɗaurin watanni 12 a gidan yari ko kuma biyan tarar Naira 200,000 kowacce. Sun zaɓi biyan tarar kuma suka biya aka sake su.