An kashe ƴan ta’adda 25 a yayin da sojoji suka daƙile wani hari a Borno

Rundunar Sojan Najeriya ta ce dakarunta sun kashe ƴan ta’addan kungiyar  ISWAP da  25  da suka kai hari wani tsararren farmaki daga bangarori daban-daban a garin Kukawa, Jihar Borno. 

A cikin wata sanarwa da aka fitar a ranar Laraba, Mohammed Goni, mai rikon mukamin jami’in yada labarai na rundunar hadin gwiwa dake aikin yaƙi da ƴan ta’adda a yankin arewa maso gabas Operation Hadin Kai, ya bayyana cewa wasu sojoji ma sun rasa rayukansu a fafatawar. 

“’Yan ta’addan da suka kai hari kan dakarun   Bataliya ta musamman ta 101 daga kusurwa hudu, sun gamu da turjiya bayan  da dakarun suka mayar da martani da karfin wuta, dabarun yaki da kuma kyakkyawan tsari,” in ji sanarwar. 

Ya kara da cewa, tare da goyon bayan rundunar sojan sama, sojojin sun fatattaki ‘yan ta’addan, sun yi musu mummunan rauni, inda suka tilasta ragowar su gudu cikin rikicewa. 

Rahoton farko ya nuna cewa an kashe fiye da ‘yan ta’adda 25, inda aka gano gawarwaki 14. Haka kuma, sojojin sun kwato makamai da harsasai, ciki har da bindigogi AK-47 guda shida. 

Sanarwar ta ce ana cigaba da gudanar da bincike  domin gano karin makamai, tare da  bin sawun ‘yan ta’addan da suka tsere da kuma hana su sake taruwa. 

Sai dai kuma, an tabbatar da cewa wasu sojoji masu jarumtaka sun rasa rayukansu a wannan arangama. 

Mohammed Goni ya yi ta’aziyya ga iyalan sojojin da suka mutu, yana mai cewa: “Jarumtar su, sadaukarwa da kishin kasa za su ci gaba da zama shaida ta hidimar su ga ƙasa.”