NAFDAC ta kwace giya har ta naira miliyan 300 a jihar Lagos

Hukumar kula da ingancin abinci da magunguna ta kasa (NAFDAC) ta bayyana cewa ta kwace giya da ake  sayarwa  a cikin sachets da kwalaben roba ƴan ƙanana  jumullar darajarsu ta kai Naira miliyan 300. Hukumar ta ce wannan mataki na daga cikin aiwatar da dokar gwamnatin tarayya da ta haramta samarwa, shigo da su, rarrabawa da kuma sayar da irin waɗannan kayayyaki. 

A farkon watan Janairu, NAFDAC ta bayyana cewa manufar haramta giya a cikin ƙananan kwalabe da sachets ba wai don cutar da masana’antu ba ce, sai dai don kare matasa da yara daga shaye-shaye. Darakta Janar ta NAFDAC, Mojisola Adeyeye, ta ce bincike ya nuna cewa irin wannan giyar na giya ya taimakawq wajen yawaitar shan giya a tsakanin yara ƙanana da matasa a fadin ƙasar. 

A watan Yuli, NAFDAC ta fara gudanar da aikin kwace irin waɗannan kayayyaki a duk faɗin ƙasa. A cikin sanarwar da ta fitar a shafin X, hukumar ta ce ta rufe wasu dillalai da ke ci gaba da sayar da giya a cikin ƙananan kwalabe duk da haramcin. Haka kuma, jami’an hukumar sun gudanar da samame a kasuwannin Ile-Epo, Ojuwoye Mushin, da Oke-Arin a Lagos Island, inda aka kwashe katan-katan na  giya da aka haramta. 

NAFDAC ta ce bincike ya nuna cewa wasu dillalai da ‘yan kasuwa suna boye kayayyakin saboda hauhawar farashi da kuma ƙaruwar buƙata. Hukumar ta gargadi masu rarrabawa da ‘yan kasuwa da su daina sayarwa, rarrabawa ko boye giya a cikin ƙananan kwalabe. Ta kuma bayyana cewa mutane biyu, Grace Ehis Eke mai shekara 70, da Azudigwu Prince Eva mai shekara 43, suna hannun jami’an tsaro ana ci gaba da bincike a kansu.