Gwamnan Zamfara Ya Bayyana Wa Muƙarrabansa Da Ba Sa Jin Dadin Gwamnatinsa Su Yi Murabus

Gwamnan Jihar Zamfara, Dauda Lawal, ya bukaci jami’an siyasa da ba su gamsu da yadda gwamnatinsa ke tafiyar da mulki ba su yi murabus daga mukamansu.

Gwamnan ya bayyana hakan ne a ranar Asabar yayin taron masu ruwa da tsaki na jam’iyyar APC da aka gudanar a gidan gwamnatin jihar da ke Gusau.

Lawal ya ce wasu jami’an siyasa, ciki har da kwamishinoni, na korafin cewa ba sa samun wani abu daga gwamnati, yana mai cewa duk wanda bai gamsu da halin da yake ciki ba ya sauka daga mukaminsa.

Ya kuma bukaci ’yan APC a jihar da su kawo karshen bangaranci da siyasar kungiyoyin mutane, su hada kai a matsayin jam’iyya guda daya gabanin zaben 2027.

Gwamnan ya ce bai kamata a ci gaba da raba jam’iyyar zuwa bangaren “gidan Dauda”, “gidan Matawalle” ko “gidan Shehi” ba, yana mai kira ga mambobin jam’iyyar da su kasance karkashin tafiya guda.

Lawal ya kuma bayyana cewa zai gana da tsofaffin gwamnonin jihar domin daidaita tare da hada sunayen wadanda za su kasance cikin kwamitin yakin neman zaben APC a jihar gabanin zaben 2027.