Wani Dagacin kauye a Kano ya rasa ransa a  hannun masu garkuwa da mutane

Rahotanni sun bayyana cewa Dagacin Ƙauyen  Aujarawar Alkali da ke Karamar Hukumar Gezawa a Jihar Kano, Alhaji Ahmad Yakubu Ahmad, ya rasa ransa a hannun masu garkuwa da shi.

An sace Ahmad ne a daren  ranar Talata, 17 ga watan  Satumbar shekarar 2026, lokacin da ’yan bindiga suka kai farmaki kauyen.

Bayan an kashe shi, an gano gawarsa daga baya.

An gudanar da sallar jana’izar marigayin da misalin ƙarfe 3 na yammacin  ranar Laraba, sannan aka binne shi.

Musa Garba, mazaunin Gezawa, ya tabbatar da faruwar lamarin a zanatawar  da ya yi da wakilin jaridar Daily Trust ta wayar tarho.

A cewarsa, ’yan bindigar sun yi wa Dagacin kauyen azaba har ya mutu ta hanyar yanke ɗaya daga cikin ƙafafunsa tare da daure hannunsa.

Garba ya ce, “Na halarci sallar jana’iza yau (Laraba) da misalin ƙarfe 3 na yamma. ’Yan bindigar sun yi wa Dagacin azaba har ya mutu ta hanyar yanke ɗaya daga cikin ƙafafunsa tare da daure hannunsa a baya. An yi masa duka har ya mutu.

“Bayan mutuwarsa, masu garkuwar suka binne gawarsa a kabari marar zurfi a wani kauye mai suna Danladin Gezawa. Bayan kwana huɗu, wasu mazauna kauyen suka gano kabarin suka kuma ankarar da hukumomi

“Matar mamacin ce  ta tabbatar da gawar. An kai shi asibiti, inda aka tabbatar da mutuwarsa sannan aka binne shi daga baya saboda gawar ta fara ruɓewa.”

Rundunar ’yan sanda ta jihar Kano ba ta fitar da sanarwa a hukumance ba kan faruwar lamarin ba tukuna.