Naira na cigaba da ƙara daraja kan dalar Amurka

Naira ta ƙara ƙarfi zuwa N1,315 a kan dalar Amurka a ranar Alhamis a sashen hukuma na kasuwar canjin kuɗi na ƙasashen waje (FX).

Bayanai daga Kasuwar Canjin Kuɗi ta Najeriya (NFEM) kasuwar hukuma ta Najeriya dake musayar kuɗaɗen ƙasashen waje  sun nuna cewa kuɗin ya samu ƙari da  kashi 0.84 cikin ɗari.

Lokacin ƙarshe da farashin canjin kuɗi ya kai matakin N1,300 shine a watan Afrilu 2024.
Wannan sabon ƙimar tana wakiltar mafi ƙarfin darajar kuɗin tun lokacin da Babban Bankin Najeriya (CBN) ya gabatar da tsarin haɗa canjin kuɗi na ƙasashen waje ta hanyar lantarki (EFEMS).

A sashen da ba na hukuma ba na kasuwar ƴan canjin kuɗaɗen naira kuma ta ƙara ƙarfi zuwa N1,400 a kan dala a ranar Juma’a, daga N1,410 a kan dala a ranar Alhamis.

Ƙarin ƙarfin naira a dukkanin kasuwannin FX biyu ya zo a lokacin da asusun ajiyar kuɗaɗen waje na Najeriya ya kai mafi girman mataki a cikin fiye da shekaru 17.

Har zuwa ranar Alhamis,  asusun ajiyar FX ya tsaya a dalar Amurka biliyan 54.08, a cewar CBN, idan aka kwatanta da dalar Amurka biliyan 45.56 da aka yi rijista a ranar 2 ga Janairu, wanda ke nuna girma na dalar Amurka biliyan 8.51 ko kashi 18.69 na ci gaban shekara-zuwa-yau.