NNPCL Ta Ƙara Farashin Man Fetur Zuwa N1,345 Kan Lita

Kamfanin Nigerian National Petroleum Company Limited (NNPCL) ya ƙara farashin man fetur daga N1,270 zuwa N1,345 kan kowace lita, lamarin da ya sanya ƙarin N75 a farashin man.

Wani bincike ya nuna cewa gidajen mai na NNPCL da ke yankunan Gwarimpa da Wuse Zones 4 da 6 a Abuja sun fara sayar da man da sabon farashin a ranar Litinin.

Wani ma’aikacin gidan mai na NNPCL, wanda ya nemi a sakaya sunansa, ya tabbatar da cewa: “An ƙara farashin man fetur ɗinmu zuwa N1,345 kan kowace lita a yau (Litinin).”

Ƙarin farashin ya zo ne bayan kamfanonin MRS, Ranoil, Empire Energy da wasu gidajen mai sun ƙara farashin man da tsakanin N20 zuwa N80 kan kowace lita a ƙarshen mako.

Haka kuma, matatar Dangote ta ƙara farashin man fetur da take sayarwa daga tashar lodinta da N65, inda ya koma N1,265 kan kowace lita.

Wannan shi ne karo na biyu cikin watan Agusta da NNPCL ta ƙara farashin man fetur, bayan da ta ƙara N20 a ranar 25 ga Agusta, inda farashin ya tashi daga N1,250 zuwa N1,270 kan kowace lita.