Gobara ta kashe mata da ƴaƴanta uku a wata Ruga dake Yobe

Wata gobara da ta tashi a Rugar Audu Badali dake ƙaramar hukumar Karasuwa ta jihar Yobe ta yi ajalin wata mata da kuma ƴaƴanta uku.

A wata sanarwa da aka fitar ranar Asabar hukumar bada agajin gaggawa ta jihar Yobe ta ce lamarin ya faru ne a ranar Juma’a da ƙarfe biyar na yamma.

Sanarwar ta ce mutanen da suka mutu a gobarar sun haɗa da Bilkisu matar Mallam Bukar da kuma yayansu uku Zainab, Salamatu da kuma Gasar.

Hukumar ta ce anyi jana’izar mutanen kamar yadda addinin musulunci ya tanadar. A yayin da sauran iyalan da suka tsira da rayukansu suka rasa matsuguninsu.

Hukumar ta ce ta jagoranci wata tawaga ta hadin gwiwa tare da jami’an karamar hukumar Karasuwa da kuma masu ruwa da tsaki a yankin.

A yayin ziyarar tawagar ta duba irin barnar da wutar tayi da ya haɗa muhalli da kuma kayayyaki domin gano yadda za a taimakawa mutanen da abun ya shafa