Jihar Yobe Na Samar Da Dabbobi Miliyan 10 A Shekara — Buni

Gwamnan Jihar Yobe, Mai Mala Buni, ya ce jihar na samar da kusan dabbobi miliyan 10 a kowace shekara, abin da ya sanya ta cikin jihohin da suka fi kowace jiha kiwon dabbobi a yankin Afirka kudu da Sahara.

Buni ya bayyana hakan ne yayin kaddamar da allurar rigakafin dabbobi da kuma bude wasu cibiyoyin kiwo a Cibiyar Kula da Kiwo ta Nasari, da ke ƙaramar hukumar Jakusko.

Gwamnan, wanda Kwamishinan Noma, Ali Mustapha Goniri, ya wakilta, ya ce gwamnatin jihar ta zuba biliyoyin naira wajen samar da ababen more rayuwa da kayan tallafi ga masu kiwo tun bayan kafa cibiyar a 2019.

Ya ce manufar bunkasa fannin kiwon dabbobin ita ce kara yawan amfanin kiwo, inganta rayuwar al’umma da kuma rage rikicin manoma da makiyaya.

Shi ma Ministan Raya Kiwo, Idi Mukhtar Maiha, ya yaba wa Yobe kan ci gabanta a fannin, tare da bayyana shirin kafa katafaren mayanka na zamani a Damaturu.

Ministan ya ce mayankar za ta taimaka wajen sarrafa nama, adanawa cikin na’urorin sanyaya abinci, yi masa lakabi da kuma tabbatar da ingancinsa, domin jihar ta koma daga sayar da dabbobi masu rai zuwa samar da naman da aka sarrafa.

Ya ce hakan zai kara samar da ayyukan yi, bunkasa tattalin arziki da kuma taimakawa wajen tabbatar da wadatar abinci a kasar.