Ƴan Sanda Sun Kama Barayin Ƙarafunan Titin Jirgin Ƙasa A Bauchi

Rundunar ’yan sandan Jihar Bauchi ta ce ta kwato kayayyakin layin dogo da aka lalata tare da kama wani mutum da ake zargi da hannu a satar kayayyakin gwamnati.

Rundunar ta ce ta samu bayanan sirri da misalin karfe 12:30 na dare ranar 17 ga Agusta 2026 kan lalata da satar kayayyakin layin dogo a cikin birnin Bauchi.

Jami’an da ke aiki a ofishin ’yan sanda na A Division Township sun bi sahun kayayyakin zuwa wani gidan zama da ke unguwar Doya, inda suka gano tare da kwato kayayyakin gaba daya.

A cewar rundunar, an kammala aikin kwato kayayyakin da misalin karfe 3:30 na safiyar 18 ga Agusta, inda aka kama wani da ake zargi mai suna Abubakar Sanusi.

Rundunar ta ce tana ci gaba da bincike domin gano tare da cafke sauran mutanen da ake zargin suna cikin kungiyar da ke aikata laifin.

Ta kuma bukaci mazauna jihar su kasance masu sa ido tare da kai rahoton duk wani abin da suke zargi ga ofishin ’yan sanda mafi kusa.