Yaƙin da ke gudana tsakanin Iran da Isra’ila tare da Amurka ya haddasa tashin gwauron zabi a farashin man fetur a kasuwannin duniya, inda farashin ganga ɗaya ya haura dala 100.
Rahotanni sun nuna cewa tashin farashin na da alaƙa da rufe mashigin Hurmuz da Iran ta yi. Wannan mashigi na daga cikin manyan hanyoyin da ake bi wajen jigilar makamashi, inda kusan kashi 20 cikin 100 na makamashin da ake amfani da shi a duniya ke bi ta cikinsa.
Lamarin ya fi shafar kasuwannin Asiya, saboda su ne suka fi amfani da makamashin da Iran ke samarwa.
Masu sharhi kan harkokin tattalin arziki sun yi gargaɗin cewa idan yaƙin ya ci gaba har zuwa ƙarshen wannan wata, farashin gangar man fetur na iya haura dala 150.
A wani saƙo da ya wallafa a shafinsa na Internet, shugaban Amurka Donald Trump ya ce tashin farashin man fetur ɗin na wucin gadi ne, yana mai cewa gara a ɗauki wannan ƙaddarar maimakon a bar Iran ta mallaki makamin nukiliya.
Farashin Man Fetur Ya Haura Dala 100 Sakamakon Yaƙin Iran Da Isra’ila Da Amurka
