Tinubu ya naɗa sabbin kwamishinonin zaɓe

Shugaba ƙasa,Bola Ahmed Tinubu  ya naɗa sabbin kwamishinoni huɗu dake wakiltar shiyoyi  da kuma sabbin kwamishinonin zaɓe na jihohi  guda biyu domin cike guraben da ake da su bayyana a Hukumar Zaɓe Mai Zaman Kanta ta Ƙasa (INEC

Mai ba Shugaban Ƙasa shawara na musamman kan yaɗa labarai, Bayo Onanuga, ne ya bayyana hakan a cikin wata sanarwa da ya fitar ranar Juma’a.

Onanuga ya ce naɗin nasu zai tabbata ne kawai bayan amincewar na  majalisar Dattawa.

An sake naɗa Dr. Bala Bila a matsayin kwamishinan ƙasa mai wakiltar yankin Arewa maso Gabas.

Sanarwar ta bayyana sunayen sabbin kwamishinonin shiyoyin  kamar haka: Farfesa Mustapha Aliyu, wanda zai maye gurbin Farfesa Abdullahi Zuru a matsayin wakilin Arewa maso Yamma; da kuma Bashir Muhammadu Umar, wanda zai maye gurbin Farfesa Muhammad Adamu a matsayin wakilin Arewa ta Tsakiya.

Shugaba Tinubu ya kuma ba da shawarar a naɗa Misis Oluwatoyin Babalola, wadda ke matsayin kwamishiniyar zaɓe ta jihar Osun, a matsayin sabuwar kwamishiniyar ƙasa mai wakiltar Kudu maso Yamma.

Za ta maye gurbin Farfesa Cornelius Ajayi wanda wa’adinsa zai kare a ranar 24 ga Oktoba.

Sabbin kwamishinonin zaɓe na sauran jihohi guda biyu kuwa su ne tsohon babban sakataren dindindin, Dr. Samuel Akinjide Akinleye wanda zai wakilci jihar Ekiti, da kuma Zahradden Basiru Sanusi daga jihar Jigawa, wanda zai maye gurbin Farfesa Saidu Ahmed Babura.

Shugaba Tinubu ya buƙaci Majalisar Dattawa da ta gaggauta tabbatar da waɗannan naɗe-naɗen saboda babban zaɓen da ke tafe a watan Janairu.