Kamfanin Mai na Kasa, wato Nigerian National Petroleum Company Limited (NNPCL), tare da wasu gidajen mai a Najeriya, sun kara farashin man fetur (Premium Motor Spirit).
Manema labarai da suka zagaya wasu gidajen mai na NNPCL a Abuja a ranar Talata sun gano cewa an daga farashin fetur zuwa N960 kan kowace lita, daga N875 da ake sayarwa a ranar Litinin.
Wannan na nufin kamfanin ya kara N85 kan kowace lita.
An fara aiwatar da sabon farashin a gidajen mai na NNPCL da ke kan titin Kubwa Expressway, Gwarimpa, Wuse Zone 6, Zone 4 da sauran wurare a birnin.
Haka kuma, gidajen mai na Empire da Ranoil Sharon sun kara farashinsu zuwa tsakanin N960 da N980 kan kowace lita.
Sai dai har zuwa lokacin hada wannan rahoto, gidan mai na MRS da ke kan Kubwa Expressway bai fara sayar da fetur ba.
NNPC Da Wasu Gidajen Mai Sun Kara Farashin Man Fetur
