Gwamnan jihar Plateau, Caleb Mutfwang ya fadi cewa bashi da niyar sauya sheka daga jam’iyar PDP ya zuwa jam’iyar APC inda ya yi watsi da rade-radin da ake ta yi da basu da tushe.
Bayanin nasa na zuwa ne dai-dai lokacin da ake tururuwan komawa jam’iyar APC daga PDP a ciki har da gwamnan jihar Delta, Sheriff Oberevwori da kuma Umo Eno na jihar Akwa Ibom wadanda suka koma APC da dukkanin shugabannin jam’iyarsu ta PDP a jihohinsu.
Akwai kiraye-kiraye daga wasu kungiyoyi na jam’iyar APC a Plateau da su ke shawartar Mutfwang da ya koma jam’iya mai mulki abun da ya jawo zafafafan kalamai a tsakanin bangarorin biyu.
Amma da yake tsokaci kan batun a lokacin da yake zantawa da manema labarai, Mutfwang ya dage cewa jihar Plateau za ta cigaba da kasancewa a karkashin jam’iyar PDP kamar yadda take tun asali ya ce barin jam’iyar tamkar cin amanar mutanen jihar ne.
