Rundunar Tsaro ta NSCDC ta sanar da kama wasu mutane biyu da ake zargi da safarar kayayyakin layin dogo da aka lalata tare da kwato wasu katakon layin dogo a jihar Bauchi.
Mai magana da yawun rundunar ta kasa, Afolabi Babawale, ya bayyana cewa jami’an bincike na musamman sun tare wata mota kirar Peugeot Boxer mai lamba KMC-366-TE a kan hanyar Bauchi zuwa Kano.
A cewarsa, bayan bincike an gano motar dauke da katakon layin dogo da ake zargin an sace su, ana kuma kokarin kai su jihar Kano.
Wadanda aka kama sun hada da direban motar, Alzuma Yakubu mai shekara 65, da Ismail Muhammad mai shekara 32 wanda ya ce kayan nasa ne.
NSCDC ta ce ta kwace motar tare da kayayyakin da aka gano domin ci gaba da bincike.
Ƴan Civil Defence Sun Kama Masu Satar Kayan Layin Dogo a Bauchi
