Tinubu Ya Ce Yana Gyara Kurakuran Gwamnatocin Da Suka Gabata

Shugaban Najeriya, Bola Ahmed Tinubu, ya ce gwamnatinsa na gyara kura-kuran da aka samu a gwamnatocin da suka gabata, yana mai kira ga ’yan Najeriya da su ba ta damar kammala ayyukan da ta fara.

Tinubu ya bayyana hakan ne ta bakin Kakakin Majalisar Wakilai, Tajudeen Abbas, yayin wata addu’a ta musamman da aka gudanar a Masallacin Ƙasa da ke Abuja domin bikin cikar Najeriya shekaru 66 da samun ’yancin kai.

Ya ce ’yan Najeriya kada su yanke ƙauna, yana mai cewa zaman lafiya da ci gaba na dawowa a ƙasar, kuma abubuwa za su inganta yayin da dimokuraɗiyya ke ci gaba.

Shugaban ya ce gwamnati na gyara kura-kuran baya da damar da aka rasa, yana mai cewa Najeriya na kan hanyar da ta dace kuma akwai haske a ƙarshen ƙalubalen da ƙasar ke fuskanta.

Ya kuma yi kira ga ’yan Najeriya da su ba gwamnatinsa ƙarin dama domin ta dawo ta kammala ayyukan da ta fara.