Shugabancin jam’iyar PRP na kasa ya tabbatar da tsohon gwamnan jihar Cross River, Donald Duke a matsayin halastaccen wanda aka zaba da zai yiwa jam’iyar takarar shugaban ƙasa a zaɓen 2027.
Jam’iyar ta kuma tabbatar da yan takara 420 da za su yiwa mata takarar mukamai daban-daban a zaɓen na 2027.
Kwamared Muhammad Ishaq mai magana da yawun jam’iyar PRP na kasa a cikin wata sanarwa da ya fitar ya bayyana cewa an cimma matsayar daukar matakin ne a ranar Juma’a 5 ga watan Yuni bayan da aka sake duba rahoton kwamitin ɗaukaka kara kan zaɓen fitar da gwani na jam’iyar.
Ya ce bayan sake dubawa ne aka tabbatar da tsohon gwamnan jihar Cross River, Donald Duke a matsayin halastaccen wanda aka zaba domin ya yiwa jam’iyyar takarar shugaban ƙasa.
Kwamitin ya kuma tabbatar da sakamakon wasu zaɓen fitar da gwani huɗu.
Sanarwar ta ce an tabbatar da dukkanin zaɓukan fitar da gwanin amma ba tare da na kujerar majalisar tarayya ta karamar hukumar Tarauni dake jihar Kano.
