Mayakan kungiyar yan ta’adda ta Boko Haram sun tsare tare da kone wasu motoci uku dake ɗauke da kifi a yankin mil 40 dake karamar hukumar Magumeri ta jihar Borno.
A cewar wasu direbobi an kai farmaki kan motocin ne da misalin karfe 01:00 na ranar Alhamis.
Direbobin suna dauke da kifi ne da za su kai birnin Maiduguri lokacin da aka kai musu harin.
“An gode Allah tun da dukkanin direbobin sun tsira da rayukansu amma kuma an kone motocin uku kirar Pugeuot biyu da kuma J5 ɗaya da kuma wata ta yan makaranta da aka makare ta da kifi,” a cewar majiyar jami’an tsaro.
Wani direba da ba ya so a ambaci sunansa ya ce ” Mun ajiye motocin mun gudu cikin daji. Mun gode Allah tunda dukkanin mu muna raye ina gani babu yadda na iya aka kone hanyar cin abinci na kurmus ,” a cewar ɗaya daga cikin direbobin.
Ya yi kira da gwamnatin da ta kawo ɗauki kan halin da take ciki.
