Hukumar Kwastam ta Najeriya reshen Apapa a jihar Legas ta kama magungunan da suka lalace da kudinsu ya haura naira biliyan goma sha biyu da kuma hodar iblis ta Cannabis Sativa mai nauyin kusan tan ɗaya da digo takwas.
Hukumar ta ce an gudanar da samamen ne bayan samun sahihan bayanan sirri tare da haɗin gwiwar hukumar NDLEA da sauran hukumomin tsaro.
A cewar Kwastam, an gano hodar iblis ɗin da aka fi sani da “Canadian Loud” a cikin kwantena mai ƙafa arba’in. An ɓoye ta ne a cikin motoci da buhuna da ganguna. Jimillar nauyinta ta kai kilo dubu ɗaya da ɗari takwas da goma sha tara.
Haka kuma jami’an Kwastam sun kama wasu kwantena biyu ɗauke da tsofaffin magunguna da ake zargin an shigo da su domin canza lakabinsu kafin a sake sayar da su a kasuwar Najeriya.
Kwanturola Emmanuel Oshoba ya gargadi masu safarar haramtattun kaya da su daina irin waɗannan ayyuka, yana mai cewa hukumar na da kayan aiki da bayanan sirri da za su taimaka wajen cafke masu aikata laifuka.
Kwastam Ta Kama Magungunan Da Suka Lalace Da Hodar Iblis A Legas
