Kungiyar Musulmi Ta Soki Gwamnati na Najeriya Kan Rashin Ambaton Falasɗinu A UNGA

Ƙungiyar Muslim Public Affairs Centre (MPAC) ta Najeriya ta soki gwamnatin tarayya kan rashin ambaton Falasɗinu a cikin jawabin Najeriya a babban taron Majalisar Ɗinkin Duniya na 81, UNGA.

Ƙungiyar ta ce yayin da Najeriya ta yi magana kan halin da ake ciki a Gaza a taron UNGA na baya, jawabin ƙasar na bana bai ambaci Falasɗinu, al’ummar Falasɗinu ko kuma batun samar da ƙasashe biyu ba.

MPAC ta ce jawabin Najeriya ya mayar da hankali kan batutuwa kamar sake fasalin Kwamitin Tsaro na Majalisar Ɗinkin Duniya, kuɗaɗen yaƙi da sauyin yanayi, fasahar AI, basussukan duniya da yaƙi da ta’addanci a yankin Sahel.

Ƙungiyar ta danganta sauyin matsayar da ta ce an samu da ƙara kusantar alaƙar tsaro da diflomasiyya tsakanin Najeriya da Isra’ila a shekarun baya.

MPAC ta yi kira ga gwamnatin Najeriya da ta bayyana dalilin da ya sa ba a ambaci Falasɗinu ba, tare da neman ta ƙara matsayinta kan rikicin da ake ciki da kuma goyon bayan Falasɗinawa.