Kotu Ta Yanke Wa Wani Mamba Na IPOB Hukuncin Daurin Shekaru 20 A Abuja

Babbar Kotun Tarayya da ke Abuja ta yanke wa wani mutum mai shekaru 48, Paul Okechukwu, hukuncin daurin shekaru 20 a gidan yari bisa laifin kasancewa mamba a kungiyar IPOB da aka haramta.

Mai shari’a Hauwa Yilwa ce ta yanke hukuncin a ranar Alhamis, bayan Okechukwu ya amsa laifinsa kan tuhuma ta farko cikin tuhume-tuhume biyu da Gwamnatin Tarayya ta shigar a kansa.

Masu gabatar da kara sun zargi Okechukwu, wanda ya fito daga karamar hukumar Nnewi ta Kudu a Jihar Anambra, da kasancewa mamba a kungiyar IPOB a Jihar Imo a shekarar 2021, wanda suka ce ya saba wa sashe na 16 na dokar yaki da ta’addanci ta shekarar 2013 da aka yi wa kwaskwarima.

Sai dai ya musanta tuhuma ta biyu, wadda ta shafe zargin shiga wani hari da ya yi sanadin mutuwar jami’an tsaro biyu.

Babban Lauyan Gwamnatin Tarayya kuma Ministan Shari’a, Lateef Fagbemi, wanda ya jagoranci masu gabatar da kara, daga baya ya janye tuhuma ta biyu, lamarin da ya sa kotun ta soke ta.

Bayan an gyara tuhumar, masu gabatar da kara sun kira wani jami’in Hukumar Tsaro ta Farin Kaya (DSS), wanda aka bayyana da suna “ABC” domin kare ainihin sunansa.

Shaidan, wanda ya ce yana cikin tawagar da ta gudanar da bincike kan Okechukwu, ya bayyana shi a matsayin mamba a IPOB tare da zarginsa da shiga ayyukan ta’addanci, ciki har da hare-hare kan jami’an tsaro. Kotun ta amince da rahoton binciken da ya gabatar a matsayin shaida mai lamba A.

Fagbemi ya bukaci kotun ta same shi da laifi, yana mai cewa doka ta tanadi daurin akalla shekaru 20 ga wanda aka samu da wannan laifi.

Ya ce, “Saboda haka, muna rokon mai shari’a da ta yanke masa hukunci mafi tsauri, a kalla domin hakan ya zama izina ga wasu, tare da nuna cewa kasa ba za ta lamunci duk wani aikin ta’addanci ba.”

Rahoton ya ce Okechukwu ya fashe da kuka a cikin kotu tare da rokon a tausaya masa bayan masu gabatar da kara sun bukaci a yanke masa hukunci.

A hukuncinta, Mai shari’a Yilwa ta same shi da laifi tare da yanke masa daurin shekaru 20 a gidan yari. Ta ce kotun ta yi la’akari da tuhumar da kuma “tasirin da take da shi ga kasa”.

Alkalin ta bayar da umarnin tsare shi a gidan gyaran hali da Kwanturola-Janar na Hukumar Gidajen Gyaran Hali ta Najeriya zai ayyana. Za a fara kirga wa’adin hukuncinsa daga ranar da aka kama shi.

Ta kuma umurci a yi masa gyaran hali da shirin sauya tunanin tsattsauran ra’ayi bayan ya kammala wa’adin daurin nasa.