Gwamnatin Katsina ta sassauta lokacin dokar hana fita

Gwamnatin jihar Katsina ta sassauta dokar hana fita da aka saka a jihar.

Dokar hana fitar da ta taƙaita zirga-zirga daga ƙarfe 07:00 na dare ya zuwa 07:00 na safe a yanzu an sassauta ta ya zuwa 10:00 na dare zuwa 10:00 na safe a dukkanin faɗin jihar .

Sakataren gwamnatin jihar, Abdullahi Garba Faskari ya sanar cewa mataimakin gwamnan jihar kuma mai riƙon muƙamin gwamnan jihr Mallam Faruk Lawal Jobe ya gamsu da rahotanni da yake samu na ingantar yanayin tsaro a ko’ina cikin jihar saboda haka ya bayar da umarnin rage wa’adin dokar ba tare da ɓata lokaci ba.

Mai riƙon muƙamin gwamnan ya yabawa jami’an tsaro yadda suka gudanar da aikinsu da kuma al’ummar gari ta yadda suka bada haɗin kai har gwamnatin ta shawo kan lamarin.