Gwamnan Jihar Borno, Farfesa Babagana Umara Zulum, ya amince da nadin Alhaji Bunu Bukar FCNA a matsayin sabon Akanta Janar na jihar.
Mai bai wa gwamnan shawara ta fuskar yada labarai, Dauda Iliya, ne ya bayyana hakan a wata sanarwa da ya fitar, yana mai cewa wannan nadin ya yi daidai da sashe na 208, ƙaramin sashe na 2(c) na Kundin Tsarin Mulkin Najeriya na 1999 da aka yi wa kwaskwarima.
Alhaji Bunu Bukar zai maye gurbin Alhaji Bura Usman wanda zai yi ritaya ranar 8 ga watan Mayu mai zuwa.
Kafin nadin nasa, Alhaji Bukar ya kasance Darakta na Harkokin Kudin Asusun Gwamnati a ofishin Akanta Janar karkashin Ma’aikatar Kudi ta jihar.
Shi ƙwararren masani ne a fannin harkokin kudi kuma mamba ne na kungiyar Certified National Accountants (FCNA), haka kuma yana cikin kwamitin Financial Reporting Council of Nigeria.
Alhaji Bukar yana da digiri na biyu (MBA) a fannin kasuwanci da kudi da kuma difuloma ta gaba da digiri a fannin lissafi.
Yana da kwarewa mai zurfi da ta haɗa da fiye da shekaru 16 a banki da kuma shekaru 13 a aikin gwamnati.
