Hakkin mallakar hoto
TIME MAGAZINE
Tsohon hoton da ya jefa Firaministan na Canada cikin tasku kenan, inda ya yi shiga a matsayin bakar fata da kayan Larabawa
Firaministan Canada, Justin Trudeau yana ta faman mayar da martani da neman gafara kan wani rahoto da aka yi wanda ke nuna wani tsohon hotonsa, ya shafa launi na bakar fata da yin shiga ta Larabawa, saboda ana daukar hakan kamar wariyar launi ce.
A hoton Mista Trudeau ya shafa launi irin na bakaken fata a fuska da hannusa, ya kuma sanya rawani da jallabiya har da falmaran a jikinsa, inda yayi shiga ta tamkar bakin Balarabe, a lokacin wata liyafa a wata makaranta da yake koyarwa shekara 18 da ta wuce.
Mujallar Time Magazaine ce ta wallafa hoton wanda yanzu ya jawo ana ta zargin Firaministan da shiga ta cin zarafi da nuna wariyar launin fata.
Others
Justin Trudeau ya ce ya kamata a ce na fahimci illar abin a lokacin, amma ban farga ba sai yanzu
Shi dai wannan tsohon hoto, wanda ke neman sa farin jinin Firaministan da ke fuskantar neman sake zabensa, ya dusashe, tsohon malamin makarantar ya dauke shi a lokacin wata liyafa a makarantar, liyafa ta yin al’adun Larabawa, da ake kira Arabian Night.
Firaminista Justin Trudeau ya dauki hoton ne a makarantar mai zaman kanta a birnin Vancouver a lokacin.
Ya ce shi da dai bai taba tunanin za a dauki wannan shiga da ya yi a matsayin ta kwaikwayo domin muzantawa ko wariyar launin fata ba, amma ya ce a yanzu ya farga da hakan.
Firaministan dan siyasa ne da a cikin tsanaki ya sama wa kansa suna da farin jini a matsayin wanda ke da kishi kuma jagora mai kare kabilu da jinsi na marassa rinjaye a Canada.
Dan siyasa ne na wannan zamani na shafukan sada zumunta, wanda ke jagorantar jamiyyar Liberal Party wadda ta yi suna a kan akidunta na kawo sauyi kan batutuwa da suka kama daga daidaito tsakanin maza da mata zuwa ga tabbatar da ‘yanci.
A makon da ya wuce ne ya kaddamar da takararsa ta neman a sake zabensa, inda har alkaluma suka nuna yana gaba da babban abokin hamayyarsa.
Yanzu dai a wannan zabe da ake ganin zai ja hankali saboda za a fatata sosai, ana ganin bayyanar wannan hoto ka iya yi masa nakasu, wanda tuni ‘yan hamayya da masu raji ke ta caccakarsa.
