Hakkin mallakar hoto
Getty Images
Farashin danyen mai ya tashi bayan da wasu makmai masu linzami suka afkawa wasu sansanonin sojojin Amurka biyu da ke Iraki.
Farashin danyen mai samfurin Brent ya tashi da kashi 1.4 cikin 100 inda ake sayarwa kan $69.21 kowace gangar mai daya a kasuwar mai ta Asia.
Su ma ma’adinan kasa kamar gwal da kudin Japan Yen sun tashi bayan da aka kai harin.
Kazalika hannun jari a duniya ya yi kasa sakamakon rikicin da ake yi a yankin gabas ta tsakiya.
Kasuwar hannayen jari ta Japan, Nikkei 225 ta yi kasa da kashi 1.3 cikin 100 yayin da kasuwar hannayen jari a Hong Kong, Hang Seng ta yi kasa da kashi 0.8 cikin 100.
Kafar talabijin ta Iran ta ce harin ramuwar gayya ce kan kisan Babban Kwamandan kasar Qasem Soleimani.
Harin ya faru ne sa’oi bayan jana’izar Soleimani wanda ya mutu sakamakon harin da jiragen Amurka mara matuka suka kai ranar Juma’a.
Mutuwarsa dai ta haifar da fargabar cewa rikici tsakanin Amurka da Iran na iya ta’azzara.
