Hukumomi a ƙasar Faransa sun keɓe fiye da fasinjoji 700 da ke cikin wani jirgin ruwa a birnin Bordeaux bayan mutuwar wani fasinja da ake zargin ya kamu da cutar norovirus.
Rahotanni sun ce kusan wasu fasinjoji 50 kuma suna nuna alamun kamuwa da cutar, wadda ke yaɗuwa cikin sauƙi tare da haddasa amai da gudawa.
Jirgin mai suna Ambassador Cruise Line yana ɗauke da ƴan ƙasar Birtaniya da Ireland. Ya tashi daga tsibirin Shetlands a farkon watan nan, kuma an shirya ya ci gaba da tafiyarsa zuwa ƙasar Sifaniya kafin abin ya faru.
Hukumomi na ci gaba da bincike tare da ɗaukar matakan kariya domin hana cutar yaɗuwa ga sauran fasinjoji.
An Keɓe Fasinjoji Sama Da 700 A Jirgin Ruwa A Faransa
