Rundunar ’Yan Sandan Jihar Delta ta kama wata mata mai shekaru 57 da ake zargi da safarar tabar wiwi, inda aka samu buhu 13 na kayan da ake zargin miyagun ƙwayoyi ne a tare da ita.
Kakakin rundunar, Bright Edafe, ya ce jami’an sashen QRS ne suka cafke matar a garin Warri, bayan gudanar da bincike a kan wani babur mai ƙafa uku a ranar 22 ga watan Mayu, 2026.
Ya ce an dakatar da babur ɗin ne a kan titin Esisi da ke yankin Warri ta Kudu, inda a lokacin bincike aka gano buhunan 13 ɗin da ake zargin tabar wiwi ne.
Rundunar ta ce an kama matar nan take bayan gano kayan, kuma yanzu haka ana ci gaba da bincike domin gano tushen kayan da kuma inda ake kai su.
’Yan sanda sun ce za su ci gaba da bincike kan lamarin domin gurfanar da duk masu hannu a cikin al’amarin gaban kuliya.
An Kama Wata Mata Da Buhu 13 Na Tabar Wiwi A Najeriya
