Amupitan: Ba Zan Karɓi Wani Muƙami Bayan Na Bar INEC Ba

Shugaban Hukumar Zaɓe Mai Zaman Kanta ta Ƙasa (INEC), Farfesa Joash Amupitan, ya bayyana cewa ba zai karɓi wani muƙami na siyasa ko diflomasiyya ba bayan kammala wa’adinsa a hukumar.

Amupitan ya bayyana hakan ne a ranar Alhamis yayin wani taron tattaunawa da aka gudanar a cibiyar Chatham House da ke birnin Landan, mai taken, “Zaɓen Najeriya na 2027: Tafarkin Dimokuraɗiyya da Zaman Lafiyar Yanki Bayan Zaɓe.”

“Ba zan karɓi wani muƙami daga wurin kowa ba, domin zuwana nan domin yin hidima ya ta’allaka ne kan amana,” in ji shi.

Shugaban INEC ya bayyana hakan ne yayin da yake amsa tambayar ko zai ɗauki alƙawarin kin karɓar muƙamin siyasa ko na diflomasiyya bayan barin hukumar, kamar yadda magabacinsa, Mahmood Yakubu, ya yi wanda ya karɓi naɗin jakadanci daga Shugaba Bola Tinubu bayan ya jagoranci zaɓen 2023.

Yakubu na cikin mutum 32 da Shugaba Tinubu ya miƙa sunayensu ga Majalisar Dattawa domin tantancewa a matsayin jakadu a watan Nuwamba na 2025.

Daga bisani, an naɗa shi a matsayin jakadan Najeriya a ƙasar Qatar, ba tare da kasancewa ƙwararren jami’in diflomasiyya ba.

Da yake ƙarin bayani kan matsayarsa, Amupitan ya ce naɗa shi a matsayin shugaban INEC ya zo da nauyin tabbatar da kasancewarsa mai zaman kansa, tare da gudanar da zaɓe cikin gaskiya da adalci.

Ya ce, “Na kuma yi rantsuwar biyayya, ba wai kawai domin kasancewa mai zaman kansa ba, har ma domin tabbatar da cewa zaɓen da za a gudanar ya kasance cikin ’yanci, adalci da sahihanci.

“Wannan aiki ne na ƙasa, kuma dole ne wani ya yi shi. Ba aiki ba ne da mutum zai yi na tsawon shekaru biyar, sannan a ƙarshe ya kasa yin wani abu domin amfanar kansa.”

Sai dai Amupitan ya ce yana ganin ya kamata mutanen da suka shafe shekaru suna hidimar jama’a su samu damar kula da muradunsu na kansu bayan barin muƙaman gwamnati.

Ya ce, “Na shafe rayuwata gaba ɗaya ina yi wa jama’a hidima, don haka ya kamata a samu lokacin da mutum zai iya kula da kansa.”

Ya ƙara da cewa ƙwarewarsa a fannin shugabanci da kula da harkokin kamfanoni ta buɗe masa damar shiga harkokin kasuwanci masu zaman kansu.

A cewarsa, “Ni farfesa ne a fannin shugabanci da kula da kamfanoni. Na san inda ake samun dukiyar da ba a cika ganinta ba a duniya, kuma wani ɓangare na irin wannan dama yana nan a Najeriya. Mutane da dama suna nemanta, don haka ni ma ya kamata in kasance cikin masu cin moriyarta.”