Hisbah Ta Haramta wa ’yan Mata Yawon Talla da Dare a Jihar Katsina

Hukumar Hisbah ta Jihar Katsina ta haramta wa ’yan mata gudanar da tallace-tallace da dare a faɗin jihar, inda ta bayar da umarnin cewa dole ne a dakatar da irin wannan sana’a da ƙarfe 10 na dare a kullum.

Kwamandan hukumar, Saifullahi Musa, ne ya sanar da matakin a ranar Talata yayin wani taron manema labarai da aka gudanar a hedikwatar hukumar.

Ya ce an ɗauki matakin ne domin kare ’yan matan da ke gudanar da tallace-tallace a kan tituna daga cin zarafi da sauran matsalolin da ka iya fuskanta.

A cewarsa, dokar ta shafi tashoshin mota, kasuwanni da sauran wuraren taruwar jama’a da ake gudanar da tallace-tallace a faɗin jihar.

Musa ya bayyana cewa hukumar ta samu rahotannin cewa wasu daga cikin ’yan matan da ke yawon talla da dare na fuskantar cin zarafin lalata da kuma shiga wasu ayyukan da suka saɓa wa koyarwar Musulunci.

Ya ce, “Rahotanni sun nuna cewa wasu daga cikin ’yan matan suna shiga ayyukan da ba su dace ba, yayin da wasu kuma ake yi wa fyaɗe, wasu kuma suna aikata zina. Waɗannan abubuwa sun saɓa wa koyarwar Musulunci, kuma ba za mu bari su ci gaba ba.”

Kwamandan ya bayyana cewa hukumar za ta tura jami’anta zuwa muhimman wurare, ciki har da kasuwanni da tashoshin mota, domin tabbatar da bin umarnin.

Ya kuma gargaɗi iyaye da su daina barin ’ya’yansu, musamman ’ya’ya mata, suna yawon talla cikin dare, yana mai kira gare su da su ƙara kula da tsaro da jin daɗin yaransu.

A wani mataki na daban, Musa ya ce hukumar za ta fara sa ido kan masu sayar da magungunan gargajiya domin tabbatar da cewa ayyukansu sun dace da ƙa’idojin Musulunci.

Ya nuna damuwa kan yadda wasu masu wannan sana’a ke amfani da kalaman batsa da rashin kunya wajen tallata magungunansu, inda ya yi gargaɗin cewa hukumar ba za ta ƙara lamuntar irin wannan ɗabi’a ba.

Haka kuma, ya bayyana damuwa kan rahotannin sake buɗe gidajen karuwai a wasu sassan jihar, inda ya umarci masu gudanar da irin waɗannan wurare da su rufe su, ko kuma su fuskanci hukunci bisa doka.

Ya sake jaddada cewa har yanzu dokar hana sayar da giya, musamman barasa, tana nan daram a Jihar Katsina, yana mai gargaɗin ’yan kasuwa da su guji sayar da irin waɗannan abubuwa a wuraren da jama’a ke taruwa.

Musa ya yi kira ga mazauna jihar, musamman Musulmi, da su taimaka wa hukumar wajen gudanar da ayyukanta, yana mai cewa an kafa ta ne domin tabbatar da bin ƙa’idojin Musulunci, ba domin gallaza wa jama’a ba.

Ya tabbatar wa al’umma cewa hukumar za ta gudanar da ayyukanta bisa tanade-tanaden dokar da ta kafa ta, tare da tabbatar da aiwatar da nauyin da aka ɗora mata.