Ƴan Sanda Sun Kama Mutane Uku Kan Zargin Lalata Da Ƙananan Yara A Bauchi

Rundunar ’yan sandan jihar Bauchi ta kama mutane uku da ake zargi da lalata yara mata masu shekaru tara, 10 da 11.

Mai magana da yawun rundunar, SP Nafiu Habib, ne ya bayyana hakan cikin wata sanarwa da ya fitar ranar Alhamis, inda ya ce lamarin ya nuna irin barazanar da yara ke fuskanta da kuma muhimmancin hadin gwiwar iyaye da al’umma wajen kare su daga cin zarafi.

A cewar sanarwar, an kai rahoton farko ranar 12 ga Oktoba a ofishin ’yan sanda na Tilden Fulani, karamar hukumar Toro. Wata uwa ta zargi wani mutum mai shekaru 47, mai suna Auwal Ibrahim, mazaunin Unguwar Sarkin Hausawa, da ya yaudari ’yarta mai shekaru 11 da Naira 500, sannan ya ja ta zuwa wani kunkuntar wuri inda ake zarginsa da lalata ta.

An garzaya da yarinyar zuwa Babban Asibitin Toro domin samun kulawar likitoci. Sanarwar ta ce wanda ake zargin ya musanta zargin da farko, yayin da jami’an bincike suka ziyarci wurin da lamarin ya faru.

Rahoton na biyu ya shafi wata yarinya mai shekaru tara daga Gwallameji, Bauchi. Mahaifiyarta ta kai rahoto ofishin ’yan sanda na Division E ranar 13 ga Oktoba, inda ta zargi wani mutum mai shekaru 35, Sabitu Muhammed, da ya yaudari yarinyar zuwa dakinsa tare da lalata ta a lokuta daban-daban.

’Yan sanda sun kama wanda ake zargin, sannan suka kai yarinyar asibitin rundunar da ke Bauchi domin binciken lafiya da sauran taimako. Daga bisani, an mika lamarin zuwa sashen binciken manyan laifuka na jihar domin zurfafa bincike.

A lamarin na uku, wata mata mai shekaru 40 daga unguwar Wuntin Dada ta kai rahoto ofishin ’yan sanda na Division B da ke GRA, Bauchi, ranar 13 ga Oktoba. Ta zargi wani matashi mai shekaru 22, Anas Adam, mazaunin unguwar, da ya tare ’yarta mai shekaru 10 a lokacin da ta dawo daga sayen sukari, ya kai ta gidansa sannan ya lalata ta.

Sanarwar ta ce jami’an bincike sun ziyarci wurin da ake zargin lamarin ya faru, yayin da aka kai yarinyar asibitin ’yan sanda domin duba lafiyarta. An kuma kama wanda ake zargin.

Kwamishinan ’yan sandan jihar, Sani-Omolori Aliyu, ya yi Allah-wadai da abubuwan da ake zargin sun faru, inda ya bayyana su a matsayin ayyukan rashin tausayi da cin zarafin bil’adama.

Ya tabbatar wa wadanda abin ya shafa da iyalansu cewa rundunar za ta gudanar da cikakken bincike tare da gurfanar da duk wanda aka samu da laifi a gaban kotu.

Kwamishinan ya bukaci iyaye, masu kula da yara da shugabannin al’umma da su sa ido sosai kan yara, tare da kai rahoton duk wani hali da ake zargi ko cin zarafi zuwa ofishin ’yan sanda mafi kusa.

Ya jaddada cewa kare yara nauyi ne da ya rataya a wuyan kowa domin dakile cin zarafi da kuma kare makomar ’ya’ya mata.