Ma’aikatan gwamnati sun fara yajin aikin gargadi na kwanaki uku

Ma’aikatan gwamnati a ƙarƙashin  gamayyar ƙungiyar Joint National Public Service Negotiating Council (JNPSNC) sun fara yajin aikin gargadi na kwana uku saboda gazawar gwamnatin tarayya wajen magance buƙatun su da suka dade suna nema. 

Sanarwar yajin aikin ta fito daga sakataren ƙasa na JNPSNC, Gbenga Olowoyo, wanda kuma shi ne sakataren ƙasa na  ƙungiyar ma’aikata ta Nigeria Civil Service Union (NCSU). 

Ƙungiyar ta ce ta fara yajin aikin ne saboda gwamnati ta ƙi rage farashin man fetur zuwa N500 da kuma amincewa da sabon albashi ga ma’aikata. 

A cikin wasiƙar da aka aika wa Shugaba Bola Tinubu ranar 21 ga Satumba, ƙungiyar ta gabatar buƙatu uku da suka haɗa da : fara tattaunawa kan sabon mafi ƙarancin albashi da bai ƙasa da N500,000 daga shekarar 2027, rage farashin man fetur zuwa N500 a lita, da sauran buƙatu. 

Tun da Tinubu bai amsa ba, ƙungiyar ta ce dole ne su fara yajin aikin daga daren Juma’a 2 ga Oktoba 2026 zuwa Lahadi 4 ga Oktoba 2026. 

Olowoyo ya ce: “Raɗaɗin tattalin arziki da na tunani ya zama abin da ba za a iya jurewa ba. Lokacin da ya dace mu tashi tsaye don yajin aikin gargadi na kwana uku ya yi.”