Atiku Ya Tambayi Dalilin Da Ya Sa Tinubu Ke Ci Gaba Da Zama A Faransa

Dan takarar shugaban kasa na jam’iyyar African Democratic Congress (ADC), Atiku Abubakar, ya nemi Shugaban Kasa Bola Tinubu ya yi bayani kan dalilin da ya sa ya ci gaba da zama a Paris, Faransa, bayan karewar wa’adin hutun da aka sanar.

Atiku, ta hannun mai taimaka masa kan harkokin yada labarai, ya ce hutun makonni uku da Fadar Shugaban Kasa ta sanar tun farko ya wuce, amma Tinubu bai koma Najeriya ba.

Ya ce Tinubu ya shafe kwanaki 28 a wajen Najeriya, wanda ya kai kwanaki bakwai sama da kwanaki 21 da ya yi nuni da su a matsayin lokacin da Kundin Tsarin Mulkin Najeriya ya tanada wajen sanar da Majalisar Dokoki ta Kasa idan shugaban kasa ba zai kasance a Najeriya ba.

Atiku ya kuma yi tambaya kan ko an aika wa Majalisar Dattawa da Majalisar Wakilai wasikar da Kundin Tsarin Mulki ya tanada.

“The obvious question is: what exactly is keeping the President of Nigeria in Paris? So where is the letter? If it was transmitted, let the Presidency, Senate President or Speaker publish it.”

Ya kuma ce idan ba a aika da wasikar ba, ya kamata a bayyana wa ’yan Najeriya dalilin da ya sa ba a bi tsarin da Kundin Tsarin Mulki ya tanada ba.

Atiku ya kuma kawo misalin tsohon Shugaban Kasa Muhammadu Buhari, wanda ya ce ya taba mika ragamar gudanar da ayyukan shugaban kasa ga mataimakinsa, Yemi Osinbajo, sau biyar a lokacin mulkinsa, ciki har da ta hanyar sanarwa ga Majalisar Dokoki ta Kasa.

A cewar Atiku, ya kamata a fayyace wa ’yan Najeriya halin da ake ciki kan tsawaita zaman Shugaban Kasa a Faransa, musamman yayin da kasar ke fuskantar kalubalen tsaro, tattalin arziki da tsadar rayuwa.