Wani mutum mai shekaru 52 ya mutu bayan da ya tsunduma cikin rijiya

Wani mutum mai shekaru 52 mai suna Alaba Ayeni ya rasu bayan da ya tsunduma cikin wata rijiya a Ilorin babban birnin jihar Kwara, lamarin da ake zargin kamar yunƙurin kashe kansa ya yi.

Lamarin ya faru ne a gefen wata makaranta sananniya kusa da titin Arikewuyo. 

Ayeni ya tsunduma cikin rijiyar da ba a rufe ba wadda ake amfani da ita wajen samar da ruwa a wurin wani aikin  gini da ake yi. 

Jami’in hulɗa da jama’a na Hukumar Kashe Gobara ta Jihar Kwara, Hassan Adekunle ne ya tabbatarwa  da  jaridar  Daily Trust faruwar lamarin. 

Ya ce ba a san dalilin da ya sa mutumin ya aikata hakan ba, sai dai rijiyar tana kusa da gidansa. 

Rahotanni sun ce Ayeni ya yi wa mazauna yankin sallama yayin da yake wucewa kafin ya faɗa cikin rijiyar. 

Bayan ya faɗa cikin rijiyar, ya fara ihu wanda ya jawo hankalin yara a yankin, suka sanar da manya. 

Mai magana da yawun hukumar kashe gobarar ya ce  sun samu kiran kai ɗaukin gaggawa bayan kusan awa guda da faruwar lamarin, inda suka isa wajen da misalin ƙarfe 8:42 na safe suka fara aikin ceto. 

Daga bisani suka fito da gawar Ayeni daga rijiyar, suka kuma mika ta ga DPO na ofishin ’yan sanda na Budo-Nuhu, wanda aka bayyana da sunan Bolaji, domin ci gaba da ɗaukan matakan da suka dace.