An kama masu garkuwa da mutane lokacin da suke raba kuɗin fansa

Jami’an aikin sakai da mafarauta sun kama wasu mutane biyu da ake zargin ’yan kungiyar masu garkuwa da mutane guda hudu da ke aikata  ta’asarsu a iyakar jihohin Kogi da Enugu.

Rahoto daga yankin ya ce masu sa kai da mafarauta sun samu bayanan sirri, da ya su ga kai samame a maboyar batagarin da ke cikin dajin Egabada, inda suka kama mutane biyu yayin da suke raba kudin fansa da suka karɓa daga wani wanda suka yi garkuwa da shi.

A cewar majiyoyi wannan samame ya samu jagoranci daga SSA na gwamnan jihar Kogi kan harkokin tsaro a shiryar Idah ta ɗan majalisar wakilai inda aka kama Salisu Ladan da Sumaila Abuh a cikin dajin.

Sai dai sauran mambobin kungiyar biyu, Babunga da Zafari, sun tsere yayin samamen.

Wani mazaunin yankin ya bayyana cewa: “Gungun masu garkuwa da mutane sun mamaye dajin Egabada da Odolu, inda suke  tsoratar da mazauna da kuma matafiya  hanyar da ke haɗa jihohin Kogi da Enugu. Sun karɓi kudin fansa sannan suka saki wadanda suka yi garkuwa da su. Amma sa’a ta kare musu yayin da suke raba kudin a cikin dajin Egabada, inda ƴan sa kai da mafarauta suka kai samame suka kama Salisu Ladan da Sumaila Abuh.”

An mika wadanda aka kama ga hukumomi domin ci gaba da bincike. “An tura su zuwa sashen CID dake  binciken manyan laifuka a rundunar yan sandan jihar  domin daukar mataki. A yayin da ake  ci gaba da kokarin kama sauran mambobin,” in ji majiyar.

A wani bidiyo, wadanda aka kama sun amsa laifin, inda suka ce sun karɓi Naira 200,000 daga wanda suka yi garkuwa da shi a karshen mako.

Salisu Ladan ya ce: “Na zo Egabada domin neman aiki. Ni ma’aikaci ne daga Lokoja. Mun yi garkuwa da mutum daya ne kawai, muka karɓi N200,000 daga gare shi. Ni fa gatari na dauka, ba bindiga ba. Ban taɓa amfani da bindiga ba a irin wannan aiki.”

Har ya zuwa lokacin wallafa wannan labari rundunar ƴan sandan jihar Kogi bata fitar ranar da wata sanarwa ba kan faruwar lamarin.