2027: Tsohon Gwamnan Adamawa Bindow Ya Koma APC

Tsohon gwamnan jihar Adamawa, Mohammed Bindow, ya koma jam’iyyar All Progressives Congress (APC), inda ya sake yin rajista a matsayin ɗan jam’iyyar a mazaɓarsa da ke Mubi.

Wani jigo a APC, Ayekooto Akindele, ne ya bayyana hakan, inda ya ce shugaban APC na Mubi, Alhaji Ahmadu Guruja, da dubban magoya baya da abokan siyasar Bindow sun halarci bikin karɓar tsohon gwamnan.

Bindow ya ce ya yanke shawarar komawa APC ne bayan ya gudanar da shawarwari da abokan siyasa da makusantansa. Ya kuma bayyana cewa matakin ya yi daidai da matsayinsa na goyon bayan da’a da bin dokokin jam’iyya da kuma adawa da ayyukan da za su iya cutar da jam’iyya.

Tsohon gwamnan ya ce kafin ya yanke shawarar, ya tattauna da Mataimakin Shugaban Ƙasa, Kashim Shettima, wanda ya kira ɗan’uwansa kuma aminin siyasa.

Bindow ya kuma bayyana cewa ya gana da Shugaba Bola Tinubu kwanan nan, inda ya ce shugaban ya nuna farin cikinsa kan dawowarsa cikin APC.

Ya tabbatar da goyon bayansa ga dukkan ’yan takarar APC, tare da yin alkawarin taimaka wa jam’iyyar wajen samun nasara a zaɓukan 2027.

Bindow ya yi murabus daga ADC a ranar 1 ga Agusta 2026, kafin ya sake komawa APC.