Farashin Gas Na Girki Ya Daidaita Duk Da Ƙarin Farashin Danyen Mai

Farashin gas ɗin girki (LPG) a Najeriya ya ci gaba da kasancewa cikin yanayi na daidaito tun daga watan Yulin 2026, duk da sauye-sauyen farashin danyen mai a kasuwannin duniya.

Rahoton Daily Post ya nuna cewa farashin gas ya tashi zuwa kusan N2,000 kan kowace kilogram a watan Mayu da Yuni, daga kusan N1,200 a manyan biranen ƙasar.

Sai dai ƙarin shigo da gas daga watan Yuni da rage farashin da matatar Dangote ta yi sun taimaka wajen saukar da farashin a cikin watanni biyu da suka gabata.

Binciken kasuwa ya nuna cewa matatar Dangote da wasu dillalan gas, ciki har da NavGas, 11 PLC da Ranoil, na sayar da kilogram ɗaya kan farashin da ya kama daga N945 zuwa N960. Kamfanin A.Y.M. Shafa kuwa ya ƙara farashinsa da N15 zuwa N1,055 kan kilogram.

A Abuja da kewaye, wasu masu sayar da gas kamar Ranoil, Nigerian Independent Petroleum, NNPC Limited da A.Y.M. Shafa na sayar da kilogram ɗaya tsakanin N1,250 da N1,450, yayin da ƙananan dillalai ke sayar da shi kan N1,500.

Rahoton ya ce wannan saukar da farashi na zuwa ne kwanaki kaɗan bayan da matatar Dangote da ‘yan kasuwa suka rage farashin LPG.

Sai dai tashin farashin danyen mai zuwa kusan dala 94 kan kowace ganga ya sake haifar da fargabar yiwuwar samun sauyin farashin kayayyakin man fetur a Najeriya.