Shugaban jam’iyar APC ya mutu a wurin taron sulhu

Oyewole Mayowa Solomon shugaban jam’iyyar APC a karamar hukumar Ijumu ta jihar Kogi ya mutu.

Gidan Talabijin na Arise ya ruwaito cewa Solomon ya yanke jiki ya faɗi ne wurin wani taron sulhu da aka gudanar ranar Juma’a a ɗakin taro na Iyara dake hedkwatar karamar hukumar Ijumu.

A cewar rahoton an garzaya da marigayin ya zuwa wani asibiti bayan an bashi taimakon gaggawa.

Jimawa kaɗan bayan kai shi asibitin ne likitoci suka tabbatar da mutuwarsa

Tsohon shugaban ƙaramar hukumar Ijumu, Funsho Olumoko ne ya kira taro domin sasanta bangarorin jam’iyar da basa ga maciji da juna a jam’iyar.

An kira taron ne biyo taron sulhun da aka kira tun da farko inda Solomon da wasu shugabannin jam’iyyar suka fice daga taron.