Rundunar ‘Yan Sandan Jihar Bauchi ta fara wani samame na musamman a fadin jihar domin kama motoci marasa ingantacciyar rijista da kuma masu amfani da lambobin mota na bogi ko wadanda aka rufe.
A cewar rundunar, an kafa kotunan tafi-da-gidanka a hedikwatar shiyyoyin ‘yan sanda biyar da wasu muhimman wurare a cikin birnin Bauchi domin hanzarta gurfanar da masu laifi.
Kwamishinan ‘Yan Sandan jihar, CP Sani-Omolori Aliyu, ya ce motoci marasa rijista ko wadanda ba za a iya tantance su ba na haifar da barazana ga tsaro, domin masu aikata laifuka irin su garkuwa da mutane da fashi da makami kan yi amfani da su.
Ya gargadi cewa za a kwace duk wata mota da aka samu tana karya doka, sannan masu laifin za su fuskanci hukuncin doka wanda zai iya hada da tara da sauran takunkumai.
Rundunar ta bukaci masu ababen hawa su tabbatar da sabunta takardunsu da kuma nuna lambobin motocinsu yadda ya kamata, tare da ba jami’an tsaro hadin kai yayin gudanar da aikin.
‘Yan Sandan Bauchi Sun Fara Kama Motoci Marasa Rijista Da Masu Lambar Bogi
